Is é aidhm an taighde seo ná anailís LLBD (láidreachtaí, laigí, deiseanna agus bagairtí) a dhéanamh ar na tosca a bhaineann le cur chun cinn agus dul chun cinn na Gaeilge sna Coláistí Gaeilge agus sna pobail ina bhfuil siad gníomhach, agus moltaí a dhéanamh le cur le héifeacht agus tionchar na gColáistí. Chuige sin, rinneadh suirbhé ar dhaltaí meánscoile, a dtuismitheoirí agus a múinteoirí chomh maith le príomhoidí, múinteoirí agus cinnirí na gColáistí Gaeilge. Cuireadh grúpaí fócais le hionadaithe ó na pobail ar bun ar fud na Gaeltachta. Bhí dhá ghrúpa daltaí i gceist: grúpa a bhí ag freastal ar Choláiste Gaeilge samhradh 2012 (Grúpa A) agus grúpa cóimheasa nach raibh ag freastal (Grúpa B). Rinneadh measúnú (féinmheasúnú agus tástáil oibiachtúil chainte) ar chumas teanga na ndaltaí ag dhá phointe ama, roimh na cúrsaí Gaeltachta agus ina ndiaidh.